Yəmənin beynəlxalq səviyyədə tanınmış hökuməti ölkədə husilərlə qarşıdurmanın kəskinləşməsi fonunda ümumi səfərbərlik elan edib.
Vətəninfo.az xəbər verir ki, qərar Prezident Liderlik Şurasının sədri Rəşad əl-Əliminin müraciətindən sonra ölkənin Nümayəndələr Palatası tərəfindən təsdiqlənib. Səfərbərlik qərarı dərhal qüvvəyə minib və onun tətbiqinə səbəb olan hallar aradan qalxanadək qüvvədə qalacaq.
Parlamentin açıqlamasına görə, qərarın əsas məqsədi husilərin gərginliyi artırmasının qarşısını almaq, əhalinin təhlükəsizliyini təmin etmək, respublika quruluşunu və dövlət suverenliyini qorumaqdır. Yəmənin siyasi qüvvələri də fikir ayrılıqlarının kənara qoyulmasına və Səudiyyə Ərəbistanının rəhbərlik etdiyi koalisiya ilə fəaliyyətin əlaqələndirilməsinə çağırış ediblər.
Qərarın qəbulundan sonra Rəşad əl-Əlimi Ər-Riyadda Yəmənin Baş naziri Şeyya əl-Zindani, hökumət üzvləri və hərbi komandanlığın nümayəndələri ilə görüş keçirib. Tərəflər səfərbərlik qərarının praktiki icrası ilə bağlı məsələləri müzakirə ediblər.
Görüşdə, həmçinin, husilərin sıralarını tərk etmiş şəxslərin statusunun tənzimlənməsini və onlara amnistiya verilməsini nəzərdə tutan “Təhlükəsiz Qayıdış” təşəbbüsü müzakirə olunub.
Əl-Əliminin sözlərinə görə, son 72 saat ərzində hökumət qüvvələri müxtəlif istiqamətlərdə 756 əməliyyat keçirib. O, bu əməliyyatlar nəticəsində husilər arasında 2,3 mindən çox ölən və yaralananın olduğunu bildirib. Bu rəqəmlər Yəmən hökumətinin nümayəndələri tərəfindən açıqlanıb.
Yəməndə hökumət qüvvələri ilə husilər arasında silahlı qarşıdurma 2014-cü ildən davam edir. Hökumət qüvvələri Səudiyyə Ərəbistanının dəstəyi ilə fəaliyyət göstərir.
2026-cı ilin avqustunda husilərin ölkənin cənub-qərbində hücuma keçdiyi bildirilir. Sentyabrın 10-11-də hərəkatın Mokha limanını və Bab əl-Məndəb boğazına çıxışı olan bir sıra əraziləri nəzarətə götürdüyü qeyd edilir. Bundan sonra hökumət qüvvələri boğaz ətrafında bir neçə əks-hücum həyata keçirib.
