Ukrayna Prezidenti Volodimir Zelenski ABŞ administrasiyasının Kiyevdən Rusiyanın neft emalı zavodlarına hücumları dayandırmağı tələb etdiyini, lakin bunun müqabilində Ukraynanın hava hücumundan müdafiə imkanlarının gücləndirilməsi üçün əlavə dəstək vermədiyini bildirib.
Vətəninfo.az xəbər verir ki, bu barədə “Bloomberg” məlumat yayıb.
Zelenskinin sözlərinə görə, o, Vaşinqtona qarşılıqlı addımları nəzərdə tutan təklif irəli sürüb. Təklifə əsasən, Ukrayna Rusiyada dizel yanacağı istehsalına zərbələri dayandırmağa hazırdır, ABŞ isə bunun müqabilində Ukraynaya enerji və digər mühüm obyektləri qorumaq üçün “Patriot” hava hücumundan müdafiə sistemlərinin raketlərini təqdim etməlidir.
“Lakin onlar sadəcə olaraq hücumları dayandırmağımızı istəyirlər. Əks halda, bizə nəyisə verməyi dayandıracaqlarını deyirlər”, – deyə Zelenski bildirib.
Ukrayna lideri hesab edir ki, Vaşinqtonun bəzi addımları Kiyevi Rusiyanın qarşısında kapitulyasiyaya məcbur etmək cəhdi təsiri bağışlayır. Bununla belə, o, ABŞ-ın məqsədinin məhz bu olduğuna inanmaq istəmədiyini vurğulayıb.
Zelenski ABŞ-la münasibətlərin aralıq seçkilərindən sonra yaxşılaşacağına ümid etdiyini də bildirib. Onun fikrincə, hazırda ABŞ-dakı siyasi mübarizə iki ölkə arasındakı münasibətlərə mənfi təsir göstərir.
Məlumata görə, Ukrayna Prezidenti ABŞ-ın hərbi yardımının azalmasından, xüsusilə də “Patriot” sistemləri üçün raketlərin tədarükündə yaranan gecikmələrdən narahatdır. Bu vəziyyət Rusiyanın Ukraynanın enerji infrastrukturu da daxil olmaqla müxtəlif obyektlərə hücumlarını davam etdirdiyi bir vaxtda Kiyevin müdafiə imkanları ilə bağlı narahatlıqları artırır.
Zelenskinin açıqlamasına əsasən, Rusiya ötən həftə ərzində Ukraynaya təxminən 2 700 dron, 1 700 aviasiya bombası və 66 raket atıb. Bildirilib ki, raketlərin əksəriyyəti ballistik raketlər olub.
