ABŞ hazırda İranla heç bir danışıqlar aparmır. Vaşinqton yalnız Tehranla danışıqların nəticə verəcəyinə dair real imkan gördüyü halda diplomatik təmaslara qayıda bilər.
Vətəninfo.az xəbər verir ki, bu barədə Ağ Evin mətbuat katibi Kerolin Levitt “Fox News”a açıqlamasında bildirib.
“Hazırda heç bir danışıqlar aparılmır. Prezident danışıqlar masasına əsaslı şəkildə oturacaqlarını hiss edənə qədər də bu belə davam edəcək. Biz hələ bunu görməmişik”, – deyə Levitt bildirib.
Ağ Ev rəsmisinin sözlərinə görə, ABŞ hazırda əsas diqqətini İrana qarşı iqtisadi təzyiqlərin gücləndirilməsinə yönəldib.
Levitt bildirib ki, ABŞ Prezidenti bütün mümkün fəaliyyət variantlarını nəzərdən keçirmək hüququnu özündə saxlayır.
O, Vaşinqtonun İrana qarşı həyata keçirdiyi hərbi və iqtisadi tədbirləri də açıqlayıb:
“Biz onların ordusunu məhv etmək üçün “Epik Qəzəb Əməliyyatı” keçirdik. İndi isə onların iqtisadiyyatını məhv etmək üçün “İqtisadi Sürgün Əməliyyatı” keçiririk”.
İrana qarşı yeni iqtisadi kampaniya
ABŞ avqustun 24-də İrana qarşı “İqtisadi Sürgün Əməliyyatı”na başladığını açıqlayıb.
ABŞ Maliyyə naziri Skott Besantın sözlərinə görə, Vaşinqton iqtisadi təzyiq kampaniyası çərçivəsində İranın maliyyə mənbələrinə çıxışını maksimum dərəcədə məhdudlaşdırmağı planlaşdırır.
ABŞ administrasiyası, həmçinin İrana yardım göstərən ölkələrə qarşı ikinci dərəcəli sanksiyaların tətbiq oluna biləcəyi barədə xəbərdarlıq edib.
Beləliklə, Vaşinqton hazırda Tehranla diplomatik danışıqlardan daha çox iqtisadi təzyiq mexanizmlərinə üstünlük verir və İranın mövqeyində dəyişiklik baş verəcəyi təqdirdə danışıqların yenidən gündəmə gələ biləcəyini istisna etmir.
