Bizim evimizdə nənəmdən qalma köhnə bir sandığımız var.Adətən evdəki ən dəyərli,qiymətli əşyalarımızı bu sandığa qoyuruq.Anamın qır-qızılı,babamın Kərbəladan gətirdiyi Qurani-Kərim gözümü açandan bu sandığda olub.Birdə bu köhnə sandığda, Qurani-Kərimin yanında,ütülənib-qatlanmış üçrəngli bayrağımız olardı.Mən bu üçrəngli bayrağı həmişə bu sandığda-ən dəyərli şeylərin yanında görmüşdüm.Çünki ailəmiz üçün,xüsusilə birinci Qarabağ müharibəsindən qazi olan atam üçün bu bayraq çox dəyərli idi.Buna görədə tozlanmasın,əl-ayaqdan uzaq olsun deyə burda Qurani-Kərimin yanında olardı.Ta ki, 2020-ci ilin 27 sentyabrına kimi.Həmin gün atam bayrağımızı çıxarıb,həyətimizdə ən hündür yerə asdı.Elə bir yerə ki,oradan bu müqəddəs bayrağı kəndimizin hər yerindən görmək mümkün olsun.Sonra günlər keçdikcə,torpaqlarımız qarış-qarış azad olunduqca evlərin pəncərələrindən, dirəklərdən asılan bayrağlar gündən-günə artdı.Bu qırx dörd günlük müharibədə kəndimiz mavi,qırmızı,yaşıl çiçək açmış çəmənə bənzədi.Şübhəsiz ki,bu bayraq çox mötəbər, nüfuzlu yerlərdə,beynəlxalq arenalarda,yarışlarda ən uca zirvələrdə dalğalanıb.Amma bunlardan hansı bir-birinin ardınca zəfər xəbərlərinin gəldiyi bir vaxta köhnə kənd evinin damında dalğalanan bayraq qədər əzəmətlə,qürurla,fəxarətlə dalğalana bilər?Həmin günlərdə mən anladım ki, bayrağımızın yeri məhz ən uca yerlərdi.Qoy bu zirvələrdə dalğalandıqca bayrağımız tozlansın,təki bayrağımız zirvələrdə tozlansın.Yurdumuzun sərt küləyi onu zədələsə,al günəşi rəngini soldursada olar.Yetər ki, bayrağımız zirvələrdə olsun.
Artıq müharibə çoxdan bitib amma bayrağımız yenə də həyətimizdə ən hündür yerdədir.Atam “bundan sonra burda qalsın,hər baxanda bizə qələbəmizi xatırlatsın” dedi.Doğurdanda müharibə çoxdan bitsə də evlərin pəncərələrindən asılmış bayağları görəndə insan o qürurlu günləri,tarixi zəfərimizi yenidən xatırlayır.Gözlərimizin önünə Şuşanın azad olunduğu gün küçələrin əllərində üç rəngli bayrağımız olan insanlarla necə dolub-daşdığı gəlir.O günlərdə keçirdiyimiz həyəcanı dalğalanan bayrağımızı görəndə sanki bir anlıq yenidən keçiririk.
Ölkəmizdə bayraq günü həmişə böyük təntənə ilə qeyd olunub,amma bu il bayraq günümüzün təntənsi,əzəməti həmişəkindən daha böyükdür. 9 noyabrın bayraq günü kimi qeyd olunmasına 2009-ci ildə qərar verilib.Amma 2009-cu ildə kim deyə bilərdi ki,bir vaxt gələcək bizim bayraq günümüz Şuşanın azad olunduğu günlə, zəfər günü ilə bir-birinə qovuşub bizə üç qat bayram secinci yaşadacaq.Bəli bu bayraq günündə bayağımız daha əzəmətlidi.Çünki artıq bu bayraq Şuşada,Laçında, Ağdamda, Cəbrayılda dalğalanır.Bundan sonra müqəddəs bayrağımız zəfər günündə dalğalanacaq.Indi bayrağımız ərazi bütövlüyü bərpa olunmuş vətənimizin hər yerində,hər bucağında milli suverenliyimizin simvolu kimi dalğalanır və dalğalanacaq.Bayraq günün mübarək Azərbaycan,zəfər günün mübarək Vətən,bayrağımız zirvələrdən enməsin!
Nəsimi Rayon gənci Əliyeva Fidan.