Badamdar qəsəbəsi, Seymur Məmmədov küçəsində aparılan söküntü işləri sakinlərin ciddi narazılığına səbəb olub. Belə ki, ərazidə üç ev sökülərək sakinlər köçürülsə də, söküntü zamanı qonşuluqda yaşayan ailələrə heç bir rəsmi xəbərdarlıq edilmədən işlərə başlanılıb.
Sakinlərin sözlərinə görə, söküntü işləri onların evdə olduğu vaxtda aparılıb, nəticədə uşaqlar qorxub, evlərin dam örtükləri və divarları zərər görüb, bir sıra evlərin strukturu ciddi zədələnib.
Səbail Rayon İcra Hakimiyyətindən bildirilib ki, Seymur Məmmədov küçəsində yeni mülkiyütcinin aldığı qəzalı vəziyyətdə olan fərdi yaşayış evi sökülüb. Qeyd olunub ki, tərəflər arasında bir neçə dəfə görüş keçirilsə də, sakinlərin tələb etdiyi məbləğ yüksək olduğuna görə razılıq əldə olunmayıb.
Ərazidəki ağaclarla bağlı isə Dövlət Ekoloji Xidmətinin əməkdaşları tərəfindən araşdırma aparılıb və məlum olub ki, Seymur Məmmədov küçəsi 13 ünvanında ağaclar qanunsuz şəkildə kəsilib. Faktla bağlı toplanan materiallar hüquq-mühafizə orqanlarına təqdim olunması üçün hazırlanır.
