Mütəxəssislər xəbərdarlıq edir ki, gündəlik həyatda tez-tez istifadə olunan bəzi qidalar sağlamlıq üçün ciddi təhlükəyə çevrilə bilər.
Həkimlərin sözlərinə görə, uzun müddət yanlış qidalanma ürək-damar xəstəliklərindən tutmuş diabetə, piylənməyə və hətta daxili orqan problemlərinə qədər bir çox risk yaradır.
Xüsusilə hazır və emal olunmuş qidalar orqanizmə ən çox zərər verən məhsullar sırasında göstərilir. Kolbasa, sosiska, fast-food və paketlənmiş qəlyanaltıların tərkibində yüksək miqdarda duz, şəkər və zərərli yağlar olur. Bu maddələr zamanla damarların tutulmasına, təzyiqin yüksəlməsinə və maddələr mübadiləsinin pozulmasına səbəb ola bilər.
Qazlı və şəkərli içkilər də təhlükəli məhsullar siyahısındadır. Mütəxəssislər bildirirlər ki, bu içkilərin həddindən artıq qəbulu qaraciyərin yağlanmasına, insulin müqavimətinə və artıq çəkiyə gətirib çıxarır. Enerji içkilərinin isə ürək ritminə mənfi təsir etdiyi vurğulanır.
Trans yağlarla zəngin qidalar da orqanizmin “gizli düşməni” hesab olunur. Xüsusilə marqarin, ucuz şirniyyatlar və dərin yağda qızardılmış məhsullar xolesterinin artmasına səbəb olur. Bu isə infarkt və insult riskini yüksəldir.
Həkimlər duzun həddindən artıq istifadəsinin də təhlükəli olduğunu bildirirlər. Çox duz qəbul edən insanlarda böyrək və ürək problemləri daha tez yaranır. Eyni zamanda, gündəlik normadan artıq şəkər istifadəsi immun sistemini zəiflədə və xroniki yorğunluq yarada bilər.
Mütəxəssislər sağlam qalmaq üçün təbii qidalara üstünlük verməyi, hazır məhsulları minimuma endirməyi və gündəlik qidalanmada balansı qorumağı tövsiyə edirlər.Musavat.com
