Ukraynanın Rusiya ərazisinin dərinliklərinə endirdiyi zərbələrin Kreml rəhbəri Vladimir Putini Ukraynaya qarşı hücumları gücləndirməyə sövq edə biləcəyi bildirilir.
Vətəninfo.az xəbər verir ki, Fox News-a danışan ABŞ Dövlət katibinin keçmiş müavini Kerri Filipetti Ukraynanın son dövrdə Rusiya ərazisinin daha dərinliklərinə zərbələr endirdiyini və bunun Moskva üçün ciddi narahatlıq yaratdığını bildirib.
Onun sözlərinə görə, Ukrayna Silahlı Qüvvələri bu il Rusiya ilə müharibədə müəyyən irəliləyiş əldə edib və Moskva ilə yanaşı, Sankt-Peterburq yaxınlığındakı ərazilər də daxil olmaqla Rusiyanın dərinliklərini hədəfə ala bilib.
Filipetti hesab edir ki, bu hücumlar Rusiya tərəfi arasında narahatlıq yaradıb və Moskvanı Ukraynaya qarşı daha intensiv zərbələr endirməyə sövq edə bilər.
Ekspertin fikrincə, Putin təzyiq altında qaldıqda nəzarəti yenidən ələ almağa çalışır. O, Rusiyanın Ukraynanın hərbi imkanlarını zəiflətməklə yanaşı, əhalinin müqavimət iradəsini qırmağa yönəlmiş strategiya həyata keçirdiyini iddia edib.
Filipetti Rusiyanın əsas məqsədinin Ukraynanı insan resursları, hərbi texnika və döyüşmək iradəsi baxımından tükəndirmək olduğunu bildirib. Onun sözlərinə görə, buna baxmayaraq, Rusiya qüvvələri bu il ərazi ələ keçirmək baxımından əhəmiyyətli nəticə əldə etməyib.
ABŞ-li ekspert Ukraynanın Müstəqillik Günü ilə bağlı tədbirlərdə Avropa liderlərinin iştirakını da qiymətləndirib. O bildirib ki, bu, Kiyevin beynəlxalq dəstəyinin davam etdiyini nümayiş etdirir. Bununla yanaşı, böyük ictimai tədbirlərin mümkün təhlükəsizlik risklərini də artırdığını vurğulayıb.
Müharibənin gedişatı ilə bağlı digər məlumatlarda isə Rusiyanın raket istehsalını artırdığı bildirilir.
Avstriyalı polkovnik Markus Reisner Rusiyanın Ukraynaya qarşı davam edən zərbələrə baxmayaraq, 2 minədək ballistik raket ehtiyatı toplaya biləcəyini bildirib. Onun əvvəlki qiymətləndirmələrinə görə, Rusiyanın aylıq ballistik və qanadlı raket istehsalı 2025-ci ildə 100-150 ədəd təşkil edə bilərdi. Hazırda isə bu göstəricinin ayda 200 raketə çatdığı iddia edilir.
Bu arada, Rusiyanın Dövlət Dumasında Ukraynaya qarşı müharibənin 2030-cu ilə qədər davam etdirilməsi ehtimalının müzakirə edildiyi bildirilir. Dumanın Müdafiə Komitəsinin üzvü Viktor Sobolev müharibənin Moskvanın qələbəsi ilə başa çatacağını iddia edib.
Rusiya rəsmisi həmçinin Avropa ölkələrinin əhalini Rusiya ilə mümkün müharibəyə hazırladığını iddia edib. Bu açıqlamalar fonunda Ukraynada müharibənin yaxın perspektivdə başa çatacağı ilə bağlı gözləntilər isə qeyri-müəyyən olaraq qalır.
