Milli Məclisin İnsan Hüquqları Komitəsində 2024-cü ilin “Yaşıl dünya naminə həmrəylik ili” elan edilməsi, bu ilin noyabrında Bakıda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində bir sıra tədbirlər keçiriləcək.
Vətəninfo.az xəbər verir ki, bu barədə Komitənin payız sessiyası üçün nəzərdə tutulmuş iş planında yer alıb.
Belə ki, sessiya müddətində “Milli Parlamentlər, ekoloji insan hüquqları və davamlı inkişaf – “Yaşıl Qarabağ” adlı beynəlxalq konfrans keçiriləcək. Konfransda türk dövlətləri, həmçinin xarici ölkə parlamentlərinin insan hüquqları komitələrinin iştirakı gözlənilir.
Həmçinin ekoloji profilli QHT-lər və Ekologiya və Təbii Sərvətlər Nazirliyi ilə birgə ekoloji insan hüquqları mövzusunda müzakirələrin aparılması nəzərdə tutulur.
Eyni zamanda, COP29-ekoloji və milli iqlim qanunvericiliyi, dünya təcrübəsinin müqayisəli təhlili və Azərbaycan mövzusunda müzakirənin keçirilməsi də diqqət mərkəzində olacaq.
