Dünya Çempionatı-2026-da qrup mərhələsinin son turuna yaxınlaşdıqca hər xalın dəyəri daha da artır. İyunun 24-25-də A, B və C qruplarında keçiriləcək altı qarşılaşma bu etapın ilk hissəsinin son akkordları olacaq. Bəzi ölkələrin taleyi konkret bu oyunlardan asılıdır. Favoritlərin təzyiq altında olduğu, sürprizlərin isə hər an baş verə biləcəyi matçlar futbolsevərlərə əsl həyəcan vəd edir. Hazırkı xallara diqqət yetirsək, görürük ki, bəzi komandalar artıq pley-offun astanasındadır, bəziləri isə son ümidlərini bu görüşlərə bağlayıb.
Xatırladaq ki, dünya çempionatı başlayandan indiyə qədər keçən müddətdə ilk dəfə olaraq qruplarda oyunlar eyni saatda başlayır. Buna səbəb millilərin ya eyni xal yığmalarıdır, ya da bir-birinə yaxın xallara malik olmalarıdır.
Gecənin ilk dueli İsveçrə ilə Kanada arasında 23:00-da baş tutacaq.
B qrupunun liderlik uğrunda mübarizəsi olduğu üçün diqqətlər bu oyuna yönələcək. İsveçrə indiyədək nümayiş etdirdiyi intizamlı futbol və hücum xəttindəki məhsuldarlıq sayəsində favorit kimi görünür. Komanda Bosniya üzərində 4:1 hesablı qələbə qazanaraq ciddi iddiasını ortaya qoyub. Kanada isə turnirin ən xoş sürprizlərindən biridir. Qətər üzərində qazanılan 6:0 hesablı möhtəşəm qələbə komandanın hücum potensialını bütün dünyaya göstərdi. Fiziki güc, sürətli əks-hücumlar və yüksək motivasiya Kanada millisinin əsas üstünlükləridir. Bu görüşdə qalib komanda qrup liderliyini təmin edəcək. Bir sözlə, İsveçrənin təcrübəsi ilə Kanadanın enerjisi üz-üzə gələcək. Proqnozlarda İsveçrənin qalib gələcəyi göstərilir.
Hazırkı vəziyyətdə bu qrupda durum belədir:
Kanada – 4 xal (7:1)
İsveçrə – 4 xal (5:2)
Bosniya və Herseqovina – 1 xal
Qətər – 1 xal
Bosniya və Herseqovina-Qətər qarşılaşması hər iki komanda üçün son şans xarakteri daşıyır. Bosniya ilk turda Kanada ilə heç-heçə etsə də, İsveçrədən ağır məğlubiyyət aldı. Qətər isə İsveçrə ilə bərabərə qalsa da, Kanada qarşısında darmadağın oldu. Bosniyanın heyətində Avropa futbolunun təcrübəli oyunçuları yer alır və komanda kağız üzərində üstün görünür. Qətər isə texniki futbolu və sürətli keçidləri ilə fərq yaratmağa çalışacaq. Oyunun taleyini psixoloji hazırlıq həll edə bilər. Məğlub olan tərəf üçün mundial faktiki olaraq başa çatacaq. Ehtimallarda Bosniya qalib görünür.
Şotlandiya-Braziliya (02:00) oyunu birmənalı gecənin ən maraqlı və ən çox gözlənilən qarşılaşmalarından biridir.
Beşqat dünya çempionu Braziliya qrupun əsas favoriti hesab olunur. Komanda Haiti üzərində inamlı qələbə qazanıb və hücum xəttində böyük potensiala malikdir. Şotlandiya isə Haiti üzərində qalib gəlsə də, Mərakeşə uduzub. Britaniya təmsilçisi fiziki futbolu, mübarizəsi və standart vəziyyətlərdə təhlükəli olması ilə seçilir. Braziliya topa nəzarət etməyə çalışacaq, Şotlandiya isə müdafiədə sıx dayanaraq əks-hücum imkanları axtaracaq. Tarix, təcrübə və fərdi ustalıq baxımından üstünlük “sambaçılar”ın tərəfindədir. Proqnozlarda Braziliya qalib kimi bir neçə addım öndə görünür.
Qrupun ən maraqlı intriqalarından biri Mərakeş-Haiti oyununda yaşana bilər.
Mərakeş son illərdə dünya futbolunun yüksələn qüvvələrindən biridir. Komanda həm Braziliyadan xal almağı, həm də Şotlandiyanı məğlub etməyi bacarıb. Haiti isə böyük futbol ölkəsi olmasa da, dünya çempionatına vəsiqə qazanmaqla tarix yazıb. Komanda sürətli oyun nümayiş etdirir və xüsusilə açıq futbol oynayan rəqiblərə qarşı təhlükəli görünür. Mərakeş qalib gələcəyi halda növbəti mərhələ üçün böyük üstünlük əldə edə bilər. Afrika təmsilçisi həm fərdi keyfiyyət, həm də taktiki baxımdan rəqibindən üstün görünür. Bunun isə nəticəyə yansıyacağı şübhəsizdir.
Çexiya – Meksika (05:00) görüşü A qrupunun ən prinsipial qarşılaşmalarından biri olacaq.
Meksika artıq dünya futbolunun sabit iştirakçılarından biridir və böyük turnirlərdəki təcrübəsi ilə seçilir. Çexiya isə intizamlı və sistemli oyunu ilə tanınır. Avropa təmsilçisi müdafiədə etibarlı çıxış etməyə çalışsa da, hücum xəttində bəzən problemlər yaşayır. Meksika sürətli cinahları və texnikalı futbolçuları hesabına üstünlük qazanmağa çalışacaq. Çexiya isə oyunun tempini aşağı salmaq və rəqibin sürətini məhdudlaşdırmaq istəyəcək. Bu oyunun nəticəsi qrupun yekun sıralamasına birbaşa təsir göstərəcək. Meksikanın həm də ev sahibi olması Çexiya önündə bu millini üstün göstərir.
Cənubi Afrika Respublikası və Cənubi Koreya isə gecənin ən maraqlı sürpriz oyunlarından biridir. Cənubi Koreya qrupda yaxşı təsir bağışlayıb və artıq Meksika ilə gərgin mübarizə apararaq gücünü göstərib. CAR isə dünya futbolunun inkişaf etməkdə olan komandalarından biridir. Fiziki hazırlıq və mübarizə əzmi onların əsas üstünlükləridir. Amma Koreya millisinin texniki imkanları, sürətli futbolu və beynəlxalq təcrübəsi rəqibdən daha yüksəkdir. Lakin Afrika komandalarının sürpriz yaratmaq potensialı hər zaman böyük olur.
Proqnozlara gəldikdə, Cənubi Koreyanın qalib gələcəyinə inananlar çoxluq təşkil edir.
Ümumi yekun olaraq, qeyd edə bilərik ki, bu gecə keçiriləcək qarşılaşmaların əksəriyyəti qruplarda son vəziyyətə ciddi təsir göstərəcək. Braziliya, Mərakeş, İsveçrə və Meksika favorit kimi görünsə də, dünya çempionatlarının əsas xüsusiyyəti sürprizlərdir. Kanada, Şotlandiya, Haiti və Qətər kimi komandalar isə sensasiya yaratmaq üçün meydana çıxacaqlar. Bir sözlə, futbolsevərləri emosiyalar, dramatik anlar, həlledici qollar və mundial atmosferi ilə dolu uzun bir gecə gözləyir…Musavat.com
