“İşğaldan azad edilmiş ərazilərdə biznes qurmaq istəyən sahibkarlar həm xarici, həm yerli investorlar KOBİA-ya müraciət edirlər”.
Veteninfo.az xəbər verir ki, bunu İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Bakıda keçirilən İnvestisiya və Mədəniyyət Forumunda çıxışı zamanı deyib.
Onun sözlərinə görə, 800-dən çox müraciət daxil olub: “Biz bu məlumatları toplayırıq. Bütövlükdə həmin müraciətlər ticarət, xidmət, inşaat, sənaye, kənd təsərrüfatı, nəqliyyat, turizm sahələrini əhatə edir.
Yerli və xarici investorların Qarabağa investisiya yatırmağa marağı böyükdür”.
O. Məmmədov əlavə edib ki, ötən ilin dekabr ayında Şuşada ilk çörək və şirniyyat müəssisələri fəaliyyətə başlayıb: “Bu gün Şuşada kiçik və orta biznes subyektləri fəaliyyət göstərir, canlanma hiss edilir”.
