“Azərbaycanda deputat seçilir. Onun səlahiyyət müddəti başa çatandan sonra isə onun diplomatik pasportu geri qaytarılır”.
Vətəninfo.az-ın xəbərinə görə, bunu Milli Məclisin deputatı Sabir Rüstəmxanlı parlamentin bu gün keçirilən plenar iclasında deyib.
Onun sözlərinə görə, 1995-ci ildən bəri parlamentdən kənarda qalan belə şəxslərin sayı 150-200 nəfər olar: “Onların çoxu dünyasını dəyişib. Onların diplomatik pasportunun geri alınmaması ilə bağlı düşünmək lazımdır”.
Milli Məclisin sədrinin birinci müavini Əli Hüseynli isə bildirib ki, deputatın diplomatik pasportu ilə bağlı müddəalar “Deputatın statusu haqqında” qanunda əksini tapıb: “Əgər deputatlar tərəfindən də belə bir məsələ ilə bağlı təkliflər olsa, buna komitədə baxıla bilər”.
Spiker Sahibə Qafarova da deputatların bir neçə dəfə bu məsələni qaldırdığını bildirib: “Bu məsələni ona görə də nəzərə almaq olar”.
