Avstraliyada OnlyFans platformasında agentlik idarə etmiş Viktoriya Sinise xristianlığa qayıtdıqdan sonra böyüklər üçün kontent sənayesindən uzaqlaşıb. Keçmiş menecer hazırda bu sahənin mümkün mənfi nəticələri barədə xəbərdarlıq edir.
Vətəninfo.az xəbər verir ki, Sinisenin sözlərinə görə, müasir dövrdə “cinsi azadlıq” kimi təqdim olunan anlayış əslində həm qadınların, həm də kişilərin həyatına mənfi təsir göstərə bilər.
Viktoriya Sinise pandemiya dövründə maddi vəziyyətini yaxşılaşdırmaq məqsədilə OnlyFans platformasına qoşulub. Sonradan onun idarə etdiyi agentlik böyüsə də, Sinisenin daxilində narahatlıq və peşmanlıq hisslərinin də artdığı bildirilir.
Onun sözlərinə görə, həyatındakı dönüş nöqtəsi uşaqlıq illərində getdiyi kilsədə dinlədiyi moizə olub. Keşişin çıxışının ona ciddi təsir etdiyini deyən Sinise bundan sonra həyatını yenidən nəzərdən keçirərək pornoqrafiya sənayesini tamamilə tərk etmək qərarına gəlib.
“Biz cinsi azadlığı bir nemət kimi təqdim edirik. Amma əslində bizi məhv edən də məhz budur. Bu, insanları daha etibarsız edir”, – deyə Sinise bildirib.
Keçmiş menecer hesab edir ki, cinsi istəklərin sərhədsiz şəkildə təmin edilməsinə imkan verən rəqəmsal platformalar istifadəçilərin bu məzmundan uzaqlaşmasını çətinləşdirə bilər.
Sinise OnlyFans-ın təkcə kontent yaradıcılarına deyil, platformadan istifadə edən insanlara da təsir göstərdiyini düşünür.
Onun fikrincə, bu tip rəqəmsal məzmun bəzi istifadəçilərdə asılılıq, tənhalıq və depressiya kimi problemləri gücləndirə, sağlam münasibətlərin qurulmasını çətinləşdirə bilər.
Keçmiş menecer xüsusilə sosial medianın yeniyetmələrə təsirindən narahat olduğunu bildirib. Məktəblərdə keçirdiyi görüşlər zamanı OnlyFans-da fəaliyyət göstərən məşhurlara yalnız onların dəbdəbəli həyat tərzinə və səyahətlərinə görə heyran olan 15 yaşlı yeniyetmələrlə qarşılaşdığını deyib.
“Uşaqlar OnlyFans-ı xoşbəxtlik və səyahətlə əlaqələndirməyə başlayırlar. Onlar səmimi şəkildə düşünürlər ki, yaxşı həyat sürməyin yeganə yolu budur”, – deyə Sinise vurğulayıb.
Sinisenin sözlərinə görə, OnlyFans da digər böyüklər üçün əyləncə və seks sənayesi kimi müəyyən psixoloji və sosial risklər daşıyır.
Sinisenin fikirlərinə münasibət bildirən OnlyFans nümayəndəsi Fox News Digital-a açıqlamasında platformanın əsas məqsədinin kontent yaradıcılarına öz materiallarını müstəqil şəkildə idarə etmək və ondan gəlir əldə etmək imkanı yaratmaq olduğunu bildirib.
Şirkətin məlumatına görə, platformanın 2016-cı ildə fəaliyyətə başlamasından bu yana dünyanın müxtəlif ölkələrindəki kontent yaradıcılarına ümumilikdə 30 milyard dollardan çox vəsait ödənilib. Bu məbləğin 6 milyard dollardan çoxunun 2025-ci ildə əldə edildiyi bildirilir.
Hazırda Viktoriya Sinise müxtəlif ölkələrə səfər edərək valideynlər və yeniyetmələrlə görüşür. O, internetdə “asan pul qazanmaq” barədə təsəvvürlərin reallığı əks etdirmədiyini söyləyir və gəncləri böyüklər üçün kontent sənayesində fəaliyyətin mümkün nəticələri barədə məlumatlandırmağa çalışır.
