Finlandiyanın Rovaniemi şəhərində Amerika istehsalı olan yeni F-35 çoxməqsədli qırıcı aviabazasının tikintisinə başlanılıb. Bu barədə Vətəninfo.az “İnterfaks” agentliyinə istinadən xəbər verir .
“Finlandiya Müdafiə Qüvvələrinin ilk qırıcıları 2026-cı ildə Rovaniemidəki Laplandiya Hava Komandanlığına çatdırılacaq və onların 2060-cı illərə qədər istismarda olması planlaşdırılır”, – Yle portalı sentyabrın 20-də bildirib.
Hazırlıq işlərinə bu ilin iyun ayında, faktiki tikinti isə sentyabrda başlanıb. Təmir, təlim və texniki xidmət müəssisələrinin, eləcə də hava limanı obyektlərinin tikintisinin 2027-ci ilə qədər davam edəcəyi gözlənilir.
İşin təxminən 150 milyon avroya başa gələcəyi gözlənilir.
Finlandiya Hərbi Hava Qüvvələrində hazırda altmış iki McDonnell Douglas F/A-18 Hornets qırıcısı var. Daha əvvəl onların “təqaüdə çıxmasının” 2025-ci ildə başlayacağı və təyyarələrin əsasən ehtiyat hissələri üçün istifadə edilməsinin nəzərdə tutulduğu bildirilirdi.
2030-cu ilə qədər onları altmış dörd Lockheed Martin F-35A Lightning II qırıcısı əvəz edəcək.
