image-a46f5ba7-6b9a-4189-aef5-1f67e88c0b9abackend

Vitse-spiker Adil Əliyev idmançılarla görüşüb

image-reklam_sirab_01

 

 

Milli Məclisin sədr müavini, parlamentin Gənclər və idman komitəsinin sədri Adil Əliyev oktyabrın 12-də kikboksinq üzrə yeniyetmə və gənclərdən ibarət milli komandamızın üzvləri, məşqçilər, habelə tanınmış idmançılarla görüşüb.

İtaliyanın Yezolo şəhərində kikboksinq üzrə keçirilmiş WAKO uşaq, yeniyetmə və gənclər arasında dünya çempionatında əldə etdikləri qələbə və nailiyyətlər münasibətilə kikboksinqçiləri təbrik edən vitse-spiker idmançılarımıza yeni uğurlar arzu edib. O, bildirib ki, Prezident İlham Əliyev və Birinci vitse-prezident Mehriban xanım Əliyeva daim idman sahəsinə, idmançılara və onların məşqçilərinə xüsusi diqqət və qayğı ilə yanaşırlar. Məhz bu diqqət və qayğının sayəsində Azərbaycanda idman sahəsi çox inkişaf edib. İdmançılarımızın qazandığı uğurlar, idman yarışlarının ölkəmizdə ən yüksək səviyyədə təşkili Azərbaycanı dünyada idman ölkəsi kimi tanıdıb. Qeyd olunub ki, ölkəmizdə idmana və idmançılarımıza göstərilən diqqət idmançılarımızı yeni-yeni nailiyyətlərə, daha yüksək pillələrə qalxmağa ruhlandırır. İdmançılarımızın layiqli Azərbaycan vətəndaşları kimi yetişməsində, onların milli-mənəvi dəyərlərə bağlı şəkildə tərbiyəsində hər birimizin üzərinə mühüm vəzifələr düşür.

Görüşdə Azərbaycan Kikboksinq Federasiyasının Prezidenti Orxan Əliyev, Birinci vitse-prezident Ramal Aslanov, federasiya rəsmiləri, məşqçilər, idmançılar çıxış edərək onlara yaradılan yüksək şəraitə görə dövlət başçısı İlham Əliyevə və Birinci xanım Mehriban Əliyevaya öz minnətdarlıqlarını ifadə ediblər. Bildiriblər ki, bundan sonra da yeni qələbələrin qazanılması, uğurlu çıxışlarının davam etməsi üçün bütün imkanlarını səfərbər edəcəklər və əzmlə çalışacaqlar.

Daha sonra vitse-spiker Adil Əliyev səfərə yola düşən idmançılara uğurlar arzulayıb, eləcə də Azərbaycanın Milli Qəhrəmanı Asif Məhərrəmovun oğlu, Fransanın Dyepp şəhərində keçirilən Qol güləşi üzrə Dünya çempionatının qalibi Azər Məhərrəmovu Milli Məclisin Gənclər və idman komitəsinin “Fəxri Fərmanı” ilə təltif edərək, milli qəhrəmanlarımızın həyat yolunun hər bir kəsə örnək olduğunu qeyd edib.

image-49f24fe2-19e5-4e3b-9bdb-db5e64d9f2bc image-09364b2f-7ce4-4889-bc52-f75c5e7c9a62 image-a46f5ba7-6b9a-4189-aef5-1f67e88c0b9a

image-reklam_opel_02

  • whatsapp
  • messenger
  • telegram
  • vkontakte
  • odnoklassniki