Milli Məclisin Deputatı Könül Nurullayevanın Nizami rayon seçiciləri ilə görüşləri müntəzəm olaraq davam edir. İyulun 8-də millət vəkili K.Nurullayeva Nizami Rayon İcra Hakimiyyəti Rayon təsərrüfatı şöbəsinin müdiri Tariyel Tahirov ilə birgə Q.Qarayev küçəsi 69, 73, 81, və 83 ünvanlarında yaşayan Nizami rayon sakinləri ilə görüş keçirib və onların rastlaşdığı gündəlik problemlər ilə yaxından tanış olub.
Sakinləri narahat edən problemlərin aidiyyatı üzrə müvafiq qurumlara ünvanlanması üçün qeydiyyat aparılıb, bu və ya digər məsələlər ilə bağlı verdikləri suallar ətraflı cavablandırılıb və problemlərin həll olunması istiqamətində mövcud prosedur qaydaları izah edilib.
K.Nurullayevanın Deputat Qərargahından verilən məlumata görə, qaldırılan məsələlər əsasən yol kənarlarındakı işıq dirəklərinin təmiri, bloklardakı pilləkənlərın yararsız vəziyyətdə olması, yuxarı mərtəbələrdə suyun təzyiqinin aşağı olması, yaşayış yerlərinə yaxınlıqda yerləşən obyektlərdə gecə saatlarında səsucaldıcıların istifadəsi, it sürülərinin camaatı narahat etməsi və yaşayış binalarının zirzəmi qatının kanalizasiya sularından təmizlənməsi məqsədiylə əsaslı təmiri ilə bağlı olub.
Səyyar görüş sonu sakinlər tərəfindən qaldırılan məsələlərə dair araşdırmanın aparılacağı və onların həlli istiqamətində müvafiq addımların atılacağı seçicilərin diqqətinə çatdırılıb.
