Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti cənab İlham Əliyevin 2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilməsi qərara alınmışdır.
Artıq ikinci ildir ki, 27 sentyabr ölkəmizin hər yerində qeyd olunur. Bu il bu tarixi gündə ölkə başçısı cənab İlham Əliyevin işğaldan azad olunmuş rayonlarımızda olması və Füzuli rayonunda çıxışı bir daha ölkə Prezidentinin Şəhidlərimizə olan ehtiramını göz önünə gətirdi.
Cənab Prezidentin bu çıxışı da bundan əvvəlki cıxışları, müsahibələri kimi xüsusi böyük məna kəsb edir. Prezident çıxışında 44 günlük Vətən müharibəsinin demək olar ki, bütün əsas məqamlarını qeyd etdi.
Biz döyüş meydanında qisasımızı aldıq. Doğma torpaqlarımızı düşməndən azad etdik, ölkəmizin ərazi bütövlüyünü bərpa etdik. 44 günlük Vətən müharibəsi şanlı tariximizdir. Bu gün işğaldan azad olunmuş torpaqlarda qurub-yaradırıq. Bütün bunlar isə əsgər və zabitlərimizin fədakarlığı sayəsində əldə edilib.
Məhz bu 44 günlük Vətən müharibəsində Azərbaycan xalqı birlik, iradə göstərdi. Füzuli istiqamətdə beş-altı müdafiə xətti mövcud idi. Azərbaycan əsgəri, Azərbaycan zabiti bu müdafiə xəttini və bundan sonrakı müdafiə xətlərini yarmaq üçün ölümə gedirdi. Sözün əsl mənasında ölümün üstünə gedərək, öz canını fəda edirdi ki, üçrəngli Bayrağımız Şuşada və o vaxt işğal altında olan digər bütün torpaqlarda dalğalansın.
44 gün ərzində Azərbaycan Ordusu hər gün irəliyə gedirdi. Dayanmadan, durmadan, usanmadan hər gün qan tökərək, şəhidlər verərək irəliyə gedirdi, Zəfərə doğru gedirdi. Bir gün belə dayanmadı, bir gün belə geriyə addım atmadı, ancaq irəli getdi, düşməni qova-qova döyüş meydanında tarixi Zəfər çaldı.
44 gün ərzində 300-ə yaxın şəhər və kənd düşməndən azad edilmişdir. Düşmən məcbur olub kapitulyasiya aktını imzalayaraq məğlubiyyətini qəbul etdi . Bu gün hər bir Azərbaycanlı bu torpağın vətəndaşı olmaqla fəxr edir. Bizim nəsil xoşbəxt nəsildir. Çünki, şərəfli missiya bu gün yaşayan nəslin üzərinə düşüb. Xoşbəxt nəsilik ki, biz bu tarixi hadisənin həm şahidləriyik, həm də iştirakçılarıyıq. Bizdən sonra gələn nəsillər həmişə bu şanlı tarixlə fəxr edəcəklər.
Zaman keçəcək,nəsillər bir-birini əvəz edəcək, lakin Vətən uğrunda canından keçən igidlər həmişə qürurla xatırlanacaqdır. Onların xatirəsi daim əbədiləşdiriləcək.
Qaraxanbəyli kəndinin yaxınlığında Şəhidlərimizin xatirəsinə qaya parçasında abidə ucaldılması da Şəhidlərimizə olan ehtiramın bariz nümunəsidir.
Ölkə başçısı cənab Prezident İlham Əliyev çıxışında bir daha qeyd etdi ki, bütün təhdidlərin qarşısı alınacaqdır. Çünki ölkəmizin artan gücü, o cümlədən hərbi gücü müstəqilliyimizin, rahat həyatımızın təminatçısıdır, onun qarantıdır.
Bu gün Azərbaycan xalqının hər bir nümayəndəsi öz Prezidentinə inanır, müzəffər Ordusuna güvənir.
Seyid Seyidov
Suraxanı RİHB-nin Zığ qəsəbə inzibati ərazi dairəsi üzrə nümayəndəsinin müavini
