image-eliyeva-melahetbackend

Azərbaycanın xarici siyasətinin prioritetləri.

image-reklam_sirab_01

Bu gün müstəqil Azərbaycanın qədim tarixə malik dövlətçilik ənənələri tarixin müxtəlif dövrlərində böyük bir coğrafiyanı əhatə edən ərazilərdə güclü bir dövlət yaratmaqla ədalətli idarəetmə sisteminə söykənmişdir. Azərbaycan xalqı dövlətçiliyə əsaslanan milli ideyaya sahib olduğunu hər zaman göstərmiş, tarixin müxtəlif mərhələlərində bu ideyanı güclü dövlət qurmaq formasında reallaşdıra bilmişdir. Bugünkü uğurlarımızın əsas mənbəyi də bu strategiyanın və yolun uğurla davam etdirilməsi və daha da genişləndirilməsidir.

Bu milli ideyanı güclü dövlətçiliyə çevirməyi bacaran Ulu Öndər Heydər Əliyev dühasının davamçısı olan Prezident cənab İlham Əliyevin 18 illik fəaliyyəti Azərbaycana tarixdə demək olar ki, bütün sahələrdə heç zaman olmayan uğurlar gətirdi. İqtisadi, siyasi, diplomatik sahələrdə, daxili və xarici siyasətdə böyük uğurlar qazanan müstəqil Azərbaycanın uzaqgörən, təmkinli, cəsarətli, xalqa arxalanan, güclü ordu, güclü dövlət strategiyasının müəllifi cənab İlham Əliyevin rəhbərliyi altında hər zaman arzuladığı hədəfinə nail oldu.

Uzun müddət işğal altında qalan torpaqlarımız azad edildi. Xalqımızın qaməti dikəldi. Azərbaycan xalqı 2020-ci ilin 8 noyabrında yenidən doğuldu. 44 günlük Vətən müharibəsi Azərbaycan xalqının, onun liderinin, şanlı ordumuzun gücünü bütün dünyaya nümayiş etdirdi. Noyabrın 10-u ölkəmiz üçün tarixi bir gün oldu və rəşadətli Azərbaycan ordusunun döyüşlərdə əldə etdiyi zəfər Ermənistanı masa arxasında oturmağa məcbur etdi. Beləliklə Azərbaycan son iki əsrlik tarixdə ilk dəfədir ki, müharibədən ərazi itkisi ilə yox, ərazi bütövlüyünü bərpa edərək çıxdı. Bu müharibənin nəticələri ilk növbədə Azərbaycan xalqının özünə inamını qaytardı, xalqın öz liderinə, onun gücünə etibarını daha da möhkəmləndirdi. Həmin günlərdə Prezident, Ali Baş Komandan İlham Əliyevin dünyanın aparıcı medialarına verdiyi 30-dan artıq müsahibə dünya informasiya məkanında ölkəmizə qarşı olan hücumları darmadağın etdi, Azərbaycan reallıqlarını ortaya qoydu. Təbii ki Azərbaycanı dünyada bir daha güclü dövlət kimi tanıdan bu amillər ölkəmizin xarici siyasətində də mühüm önəm daşıyır. Ölkəmizin xarici siyasətinin daim açıq olduğunu, bütün ölkələrlə dostluq, qarşılıqlı münasibətlər, bir-birinə hörmət şəraitində qurulduğunu daim söyləyən dövlətimizin başçısı açıq şəkildə bəyan edir ki, bizim xarici siyasətimiz çox açıqdır, şəffafdır, sabit və müstəqildir. Elə oktyabr ayının 7-də İtaliyanın “La Repubblica” qəzetinə müsahibəsində Azərbaycan Prezidenti Azərbaycanın xarici siyasətinin başlıca prinsipinin müstəqillik olduğunu bir daha önə çəkərək vurğulamışdır ki, xarici siyasətimiz tamamilə hər hansı xarici hökmranlıqdan azaddır.

İtaliyanın Azərbaycanla dost və tərəfdaş ölkələrdən biri olduğunun, ölkələrimiz arasında bir çox sahələrdə əməkdaşlığın mövcudluğunun diqqətə çatdırıldığı müsahibədə Vətən müharibəsi dövründə də İtaliya haqqın, ədalətin tərəfdarı olduğunu bəyan edərək Azərbaycanın haqlı mövqeyini dəstəklədiyini açıq şəkildə bəyan etməsi ölkələrimiz arasındakı münasibətlərdən xəbər verir. İşğaldan azad olunmuş ərazilərdə görülən genişmiqyaslı işlər haqqında əhatəli məlumat verən cənab Prezident İlham Əliyevin müsahibəsində Əfqanıstan və Taliban höküməti ilə bağlı məsələlərə də toxunuldu. Müxbirin sualını cavablandıran dövlətimizin başçısı bildirib ki, hazırda Əfqanıstanda yeni hökümətin qurulması və xarici siyasət prioritetlərinin müəyyən edilməsi dövrüdür. Mövcud meyl, müsbət yanaşma və potensial əməkdaşlıq əlamətləri gördüyümüz halda biz əlbəttə ki, adekvat şəkildə cavab verəcəyik. Hazırda hər hansı bir addımın atılması mərhələsində olmadığımızı diqqətə çatdıran cənab Prezident ölkəmizin Əfqanıstanla yaxın coğrafiyada yerləşmədiyini, heç vaxt nə siyasi, nə iqtisadi, nədə ki, nəqliyyat sahəsi baxımından bağlı olmadığımızı bildirib.

Bununla yanaşı Prezident İlham Əliyevin “La Repubblica” qəzetinə müsahibəsində diqqət çəkən mühüm məqamlardan biri də İranın ölkəmizə münasibətlərində xoşagəlməz hallara yol verməsi haqqında söylədiyi fikirlərdir. Cənab Prezident son dövrlər ərzində baş verən prosesləri əhatəli şəkildə təsvir edərək bildirmişdir ki, Azərbaycan müstəqil dövlətdir və müstəqil siyasət aparır. Azərbaycan bütün ölkələrlə ilk növbədə isə qonşu ölkələrlə hər zaman dostluq və əməkdaşlıq münasibətlərinə üstünlük verir. Lakin bu, o demək deyil ki, hər hansı bir ölkə Azərbaycana qarşı öz iradəsini qəbul etdirə bilər. Azərbaycanın əsas istəyi dövlət sərhədlərinə hörmətlə yanaşılmasıdır. Çox təəssüflər olsun ki, İrana məxsus şirkətlər bu məsələdə hörmətsizlik sərgiləyirdilər. İlk olaraq Azərbaycan İran tərəfinə bu halların aradan qaldırılması üçün bildiriş versə də qarşı tərəfdən adekvat münasibət olmamış, əksinə bu hallar daha da intensivləşdirilmişdir. Azərbaycan dövləti tərəfindən qanuni tədbirlər görülməsi zərurəti yarandıqda isə ölkəmizə qarşı yersiz bəyanatlar verildi, hədələr edildi. Hətta Azərbaycan sərhəddinə yaxın ərazilərdə hərbi təlimlər keçirildi ki, bu da İran tərəfinin münasibətləri gərginləşdirmək cəhdlərinin davamı idi. İran tərəfi Azərbaycana qarşı əsassız iddialarla çıxış edərək, azad olunmuş ərazilərdə İsrail izi axtarmağa çalışırdı. Bütün bunlar cəfəngiyyatdan başqa bir şey deyil. Bu ərazilərdə heç bir həyat yoxdur. İşğaldan azad edilmiş ərazilər təcavüzkar Ermənistan tərəfindən həyat tamamilə məhve dilib. Bunu İran tərəfi də çox yaxşı bilir. Ermənistan Azərbaycan ərazilərini işğalda saxladığı 30 il boyunca həmin ərazilərin talan edilməsində İran şirkətləri və vətəndaşları da yaxından iştirak ediblər. Azərbaycanlılara məxsus yaşayış evləri, müxtəlif təyinatlı təsərrüfat tikililəri sökülərək İrana daşınmış, həmin ərazilər də ekoloji terror törədilmişdir. Bütün bunlar isə onu deməyə əsas verir ki, İran Ermənistanla 30 il müddətində Azərbaycan torpaqlarında talançılıq törədərək iş birliyində olub. İranın narahatlıqlarının səbəbi məhz Azərbaycanın öz ərazilərini işğaldan azad etməsidir. Bu ölkənin Azərbaycanla diqtədili ilə danışmaq cəhdləri tamamilə yersiz və uğursuzdur.

Bəli, bu gün müstəqil dövlət kimi öz iradəsinə arxalanan, müstəqil daxili və xarici siyasət yeridən, gündən-günə müstəqilliyini möhkəmləndirən Azərbaycan dünya dövlətləri sırasında özünə layiqli yer tutur. Bütün bunlar əminlik yaradır ki, Azərbaycan beynəlxalq miqyasda getdikcə daha sürətlə artmaqda olan nüfuzundan və lider ölkə statusundan istifadə edərək dünya miqyasında ədalətin və sülhün bərqərar olmasına bundan sonra da sanballı töhfələr verəcəkdir. Prezident cənab İlham Əliyevin rəhbərliyi ilə əldə olunan uğurlar bir daha göstərir ki, xalqın ona olan inamı və sevgisi ilə istənilən hədəfə nail olmaq mümkündür. Ona görə də biz hələ cənab İlham Əliyevin rəhbərliyi ilə çox uğurlara imza atacağıq.

Suraxanı rayonu, Pərviz İsmayılov adına 278 nömrəli

tam orta məktəbin direktoru Əliyeva Məlahət

 

image-reklam_opel_02

  • whatsapp
  • messenger
  • telegram
  • vkontakte
  • odnoklassniki