image-su-3backend

İşğaldan azad olunmuş ərazilərin şöhrəti bərpa edilir

image-reklam_sirab_01

Müzəffər Ali Baş Komandanın oktyabrın 3-də işğaldan azad olunmuş Tərtərin Suqovuşan qəsəbəsinə, Talış kəndinə və Cəbrayıl rayonuna səfər etməsi, həmin ərazilərdə Azərbaycan bayrağını ucaltması, bərpa işləri ilə tanış olması, təməlqoyma və açılış mərasimlərində iştirakı Qarabağın və Şərqi Zəngəzurun bərpası istiqamətində Prezident İlham Əliyevin siyasi iradəsinin, qətiyyətinin, eləcə də Azərbaycan dövlətinin gücünün və qüdrətinin növbəti dəfə isbatı oldu.
Şanlı Azərbaycan Ordusunun ildırım sürətli hücumu nəticəsində 2020-ci il 3 oktyabr tarixində Suqovuşan qəsəbəsi işğaldan azad edildi. Qəsəbənin azad olunması çox böyük əhəmiyyət kəsb edirdi. Çünki bu qəsəbənin yerləşməsi müharibənin gedişatında önəmli rol oynayır, onun əlimizdə olması bizə gələcək əməliyyatlarda üstünlük verirdi. Bu, çox əlamətdar hadisə idi, müharibənin ilk günlərində strateji qəsəbəni işğaldan azad etmək böyük uğur olaraq əsgərlərimizin döyüş ruhunun yüksəlməsinə böyük kömək idi.
Düşmən Suqovuşan və Talış kəndində çox güclü istehkamlar qurmuş, bir neçə müdafiə xətti yaratmışdı. Qəsəbəyə gedən bütün strateji yüksəkliklərdə düşmən yerləşmişdi. Azərbaycan Ordusu böyük qəhrəmanlıq və fədakarlıq göstərərək şiddətli döyüşlər nəticəsində bir gün ərzində Talışı və Suqovuşanı işğaldan azad etdi. Müharibənin ilk günündə əldə edilmiş qələbələrdən sonra növbəti yaşayış məntəqələrinin azad edilməsi xalqımıza əlavə güc verdi.
Suqovuşan qəsəbəsinin strateji əhəmiyyəti burada Suqovuşan su anbarının yerləşməsi idi. Bu su anbarı Sərsəng su anbarı ilə bərabər Ulu Öndər Heydər Əliyevin təşəbbüsü ilə 1976-cı ildə inşa edilmişdir. Anbarlarının əsas məqsədi Tərtər, Bərdə, Ağdam, Goranboy və digər rayonlara su vermək idi. İşğal zamanı isə düşmən tərəfindən bu rayonlar su ilə təminatdan məhrum edilmişdi.
İkinci Qarabağ müharibəsindəki zəfərlə Azərbaycan regiona yeni reallıqlar gətirib. Sözsüz ki, ən böyük reallıq torpaqlarımızın işğaldan azad olunmasıdır. Bu həm də son ikiəsrlik tariximizin əsas hadisələrindən biridir. 30 ilə yaxın işğal altında olan torpaqlarını azad edən Azərbaycan bununla yalnız Ermənistana deyil, dünya erməniliyinə qalib gəldi. Bu zəfərlə onilliklər boyu ermənilərin yaratdığı miflər darmadağın edildi, stereotiplər aradan qaldırıldı.
Bu qələbənin başqa bir reallığı isə Azərbaycanın regionda və dünyadakı nüfuzunu artırmasıdır. Müharibəyə qədər də respublikamız dünya birliyinin nüfuzlu və etimad göstərilən üzvlərindən biri idi. Cənubi Qafqazla bağlı heç bir qlobal layihə Azərbaycanın iştirakı və razılığı olmadan reallaşa bilməzdi. Beynəlxalq enerji təhlükəsizliyindəki söz sahibliyi, qlobal tranzit məsələlərində əsas oyunçulardan birinə çevrilməsi hələ müharibəyə qədər Azərbaycanın nüfuzunu yüksəldən mühüm amillərdir. Vətən müharibəsindəki zəfər isə dövlətimizin nüfuzunu daha da yüksəltdi və indi Azərbaycan dünyada həm də müharibədə qalib gəlmiş ölkə kimi tanınır.
Müharibədən sonra yaranan başqa bir reallıq isə işğaldan azad olunmuş torpaqlarımızın bərpası və yenidən qurulmasıdır. 30 ilə yaxın işğal altında qalan torpaqlarımız həm də erməni vandalizminin qurbanı olub. Şəhər və kəndlərimiz yerləyeksan edilib, dağıdılıb, Qarabağın və Şərqi Zəngəzurun təbiətinə, ekologiyasına zərbə vurulub, sərvətlərimiz talan olunub. Burada 30 ildə baş verənlər Ermənistanın işğalçı siyasətinin mahiyyətini özündə əks etdirir.
Müharibənin başa çatmasından ötən 11 ayda ərazilərin yenidən qurulması istiqamətində görülən işlərin miqyası olduqca əhatəli və qürurvericidir. Prezident İlham Əliyevin oktyabrın 3-də Tərtər rayonuna səfəri də göstərdi ki, azad olunmuş ərazilərimizin bərpa prosesi sürətli, dinamik və əhatəlidir.
Azad olunduqdan qısa müddət sonra, ötən ilin oktyabr ayında Prezident, Ali Baş Komandan İlham Əliyevin tapşırığına əsasən Suqovuşan və Talış kəndlərinə gedən avtomobil yollarının bərpasına başlanıldı. Bu istiqamətdə avtomobil yolları ötən əsrin 70-ci illərində Suqovuşan su anbarının tikintisi ilə əlaqədar Ulu Öndər Heydər Əliyevin tapşırığına əsasən inşa edilmişdi. Lakin uzun müddət düşmən tapdağı altında olduğundan tamamilə sıradan çıxmış və dağılmışdı.
Ötən dövr ərzində Suqovuşan və Talışa gedən yollar ən yüksək standartlara uyğun yenidən çəkilib. Prezident İlham Əliyev oktyabrın 3-də Tərtər rayonuna səfəri zamanı bu yolların açılışında iştirak etdi. Ümumi uzunluğu 28,5 kilometr, eni 9 metr olan yol 2 hərəkət zolağından ibarətdir.
Həmin gün daha bir avtomobil yolunun – Talış-Tapqaraqoyunlu-Qaşaltı-Naftalan yolunun tikintisinin təməli qoyuldu.
İşğaldan azad olunmuş ərazilərin bərpası əsasən infrastruktur sahələrindən başlamaqla kompleks xarakter daşıyır. Həm yollar bərpa olunur, həm enerji ilə təminat yoluna qoyulur, həm də kənd və şəhərlərin bərpası üçün yeni layihələr icra olunur.
Bir neçə ay əvvəl Laçında Güləbird su elektrik stansiyası istifadəyə verilmişdi. Oktyabrın 3-də isə Tərtərdə “Suqovuşan-1” və “Suqovuşan-2” kiçik su elektrik stansiyalarının yenidənqurmadan sonra açılışı oldu. Döyüşlər zamanı ermənilər 4,8 meqavat gücündə “Suqovuşan-1” və 3 meqavat gücündə “Suqovuşan-2” kiçik su elektrik stansiyalarının yararlı ehtiyat hissələrini söküb daşımış, apara bilmədiklərini isə dağıtmışdılar. Hər iki stansiya əsaslı şəkildə yenidən qurulmuş, o cümlədən onların idarəetmə mərkəzinin binaları və avadanlıqları, stansiyalararası elektrik veriliş xətti tam yenilənmişdir. “Suqovuşan-1” və “Suqovuşan-2” kiçik su elektrik stansiyaları işğaldan azad olunmuş ərazilərin, xüsusilə Suqovuşan və Talış qəsəbələrinin elektrik enerjisi ilə təmin olunmasında mühüm rol oynayacaq. Həmçinin burada istehsal olunan elektrik enerjisi paylayıcı şəbəkənin yeni çəkilən xətləri vasitəsilə digər istiqamətlərə də ötürüləcək.
Prezident İlham Əliyevin Tərtər rayonuna səfəri bir daha göstərdi ki, işğaldan azad olunmuş ərazilər sürətlə yenidən qurulur, düşmənin vurduğu yaralar sağalır. Həm də düz bir ilin tamamında azad olunmuş ərazilərimizin bərpası ilə müşahidə etdiyimiz reallıqlar Azərbaycanın gücünün, qüdrətinin ifadəsidir.

İsrafil Kərimov – Azərbaycan Jurnalistlər Birliyinin üzvü


  • whatsapp
  • messenger
  • telegram
  • vkontakte
  • odnoklassniki