Kubanın Matanzas əyalətində neft anbarında bir neçə gün əvvəl baş verən güclü yanğın nəticəsində azı 16 nəfər ölüb.
Bununla bağlı məlumatları ölkənin Səhiyyə Nazirliyi yayıb.
“Avqustun 18-nə olan məlumata görə, 146 nəfər xəsarət alıb, onlardan 18-i xəstəxanalardadır, 16 nəfər ölüb, 112 xəstə evə buraxılıb”, – nazirliyin saytında bildirilir.
Daha əvvəl 6 nəfərin öldüyü, 10-dan çox insanın itkin düşdüyü bildirilib.
Neft anbarında yanğın avqustun 5-də 25 min kubmetr neftin olduğu səkkiz çəndən birinə ildırım düşməsindən sonra başlayıb. Avqustun 7-də ikinci rezervuar partlayıb, üçüncü çənə ciddi ziyan dəyib, yanğın daha sonra dördüncü rezervuara keçib.
