“Postmüharibə dövrünün reallıqlarının təhlili bu gercəkliyə işıq salır ki, ikili siyasət deyilən məfhumu, nəhayət, ədalət, beynəlxalq hüquq əvəzləməkdədir. Yəni tarixi Zəfərimizə qədər dünyanın aparıcı dövlətləri, beynəlxalq hüquq müdafiə təşkilatları hesabatlarını qərəz, yalan, bir sözlə, hər bir ölkəyə öz yanaşmaları əsasında hazırlayırdılarsa, bu gün fərqli məqamlarla diqqətdədirlər. Belə ki, beynəlxalq hüquq müdafiə təşkilatları Ermənistanın tam olmasa da demokratik inkişaf baxımından hansı acınacaqlı vəziyyətdə olduğunu təqdim edirlər”.
Veteninfo.az xəbər verir ki, bu fikirləri Milli Məclisin deputatı Malik Həsənov bildirib.
Onun sözlərinə görə, dünənə kimi “azad ölkələr” sırasında yer alan Ermənistan bu gün yeni hesabatlarda qeyri-azad ölkədir.
“Haqqın, ədalətin zəfəri təqdir olunmaqla yanaşı, günümüzün əsas tələbi məhz yeni reallıqlar əsasında qəbul olunan bu kimi sənədlərin kağız üzərində qalmamasına nail olmaqdır. Cünki dünyada sülhün, təhlükəsizliyin təminatında, hər bir münaqişəli məsələnin həllində, dövlətlərin ərazi bütövlüyünün, suverenliyinin qorunmasında əsas rol oynayan BMT Təhlükəsizlik Şurasının qətnamələrinin 30 ilə yaxın müddətdə sadəcə bir sənəd olaraq mövcudluğu sonda 44 günlük Vətən müharibəsinə gətirib çıxardı”.
M.Həsənov qeyd edib ki, artıq tarixə qovuşan Dağlıq Qarabağ münaqişəsinin həlli prosesində Ermənistana beynəlxalq hüququ kobud şəkildə pozmasına görə heç bir təzyiq göstərilmədisə, cəzalandırılmadısa, əksinə təcavüzkar onu dəstəkləyən ölkələrdən hər cür maddi, hərbi yardımla təmin olundusa, bu halda beynəlxalq hüququn işlək vəziyyətdə olmasını dilə gətirmək mümkünsüz idi:
“İllərdən bəri davam etdirilən ikili siyasətin nəticəsi idi ki, ermənilərin havadarlarının dəstəyi ilə zaman-zaman azərbaycanlılara və türklərə qarşı həyata keçirdikləri soyqırımı və deportasiya siyasətini, XX əsrin ən dəhşətli Xocalı soyqırımını görmək istəməyən «demokratik güclər» Dağlıq Qarabağ münaqişəsi ilə bağlı Azərbaycan xalqının çəkdiyi əziyyətləri də normal qəbul edirdilər. Azərbaycanın haqq səsini eşitmək istəməyən güclərə arxalanan Ermənistanın ərköyünlüyünə göz yuman dairələrin seyrçi mövqeləri beynəlxalq hüquq normalarının üstündən çəkilən qırmızı xətt idi. İkili standartların yaratdığı ədalətsizliyi, fəsadları dəfələrlə mötəbər tribunalardan dünya ictimaiyyətinin diqqətinə çatdıran, beynəlxalq hüquq normalarının kobudcasına pozulmasının başqa dövlətlərə faciələr gətirdiyini bəyan edən ölkə Prezidenti İlham Əliyev regional təhlükəsizlik üçün bəla olan münaqişələrin yolverilməzliyini də dünyaya çatdırmışdır”.
Millət vəkili vurğulayıb ki, hesabatlarında Ermənistanı “azad”, Azərbaycanı isə “qeyri-azad ölkələr” kimi təqdim edən “Human Rights Watch”, “Amnesty International”, “Freedom House”, “İnernational Federation for Human Rights”, “Transparency İnternational” kimi təşkilatlar, ABŞ Dövlət Departamenti bu gün Ermənistanda COVID-19-la mübarizə, həmçinin 44 günlük İkinci Qarabağ müharibəsi dövründə demokratik vəziyyətin daha da ağırlaşdığını, insan hüquqlarının kobud şəkildə pozulduğunu, azad mətbuatın boğulduğunu təsdiqləyən faktları açıqlayırlar:
“Bu sənədlərdə pandemiya şəraitində hüquqları tam şəkildə əllərindən alınan, azadlıqları məhdudlaşdırılan Ermənistan cəmiyyətinin ciddi ictimai və siyasi böhran yaşamasından bəhs olunur. Ermənistan cəmiyyəti hər zaman bu böhranları yaşayıb. Sadəcə ədaləti maraqlara qurban verən adları çəkilən beynəlxalq hüquq müdafiə təşkilatları hesabatlarını sifarişlər əsasında tərtib etdikləri üçün Ermənistanı “demokratiya nümunəsi” kimi təqdim edirdilər. Bu gün artıq belə təqdimatlar mümkünsüzdür. Azərbaycan qalib ölkə kimi beynəlxalq hüququ diktə edir. Azərbaycan həmişə olduğu kimi bu gün də öz hüquqlarını müdafiə edən, iqtisadi, hərbi qüdrətini artıran, beynəlxalq aləmdə söz sahibi kimi mövqeyini möhkəmləndirən güclü dövlətdir. Tarixi Zəfərimiz dünyanın illərdir özü üçün formalaşdırdığı dəyərlər sistemini tamamilə dəyişdi. O dəyərlər sistemində ədalət əvəzinə qeyri-ədalətli yanaşma, bərabərlik əvəzinə qeyri-bərabərlik, həqiqət əvəzinə riyakarlıq, yalan hökm sürürdü. Bu gün isə dünya yalnız ədalət və beynəlxalq hüquqdan danışır. Bu, Azərbaycan dövlətinin beynəlxalq hüquqa əsaslanan müstəqil siyasətinin, qətiyyətli mövqeyinin, dünyaya bütün tribunalardan səsləndirdiyi ədalət çağırışlarının, bir sözlə, ikili standartlara son qoyan Qələbəmizin nəticəsidir”.
