Gürcüstan parlamenti müxalifət və vətəndaş cəmiyyəti təşkilatları tərəfindən geniş əks-səda doğuran və mənfi mənada “Rusiya hüququ” anlayışını alan “Xarici təsirin şəffaflığı haqqında” qanun layihəsinin müzakirəsinə bu gün başlayacaq.
Vətəninfo.az xəbər verir ki, parlamentin hüquq məsələləri komitəsi bu gün hakim “Gürcü arzusu” partiyasının təqdim etdiyi “Xarici agentlər haqqında” qanun kimi tanınan yeni layihəni müzakirə edəcək.
Müzakirə ilə əlaqədar medianın və qonaqların parlamentə girişi məhdudlaşdırılıb, “sarı təhlükəsizlik vəziyyəti” elan edilib.
Tbilisi vaxtı ilə saat 10:00-da komissiyanın iclasının başlamasına paralel olaraq müxtəlif partiya və qeyri-hökumət təşkilatlarının nümayəndələri parlament binasının girişində etiraz aksiyası təşkil edəcəklər.
Əsas etiraz aksiyasının saat 19:00-a, parlament binası yaxınlığında keçirilməsi planlaşdırılır.
