Vaşinqton iddia edir ki, Rusiya kosmosda peykləri hədəfə ala biləcək silah hazırlayır. Bu iddia ABŞ kəşfiyyatına əsaslanır.
Vətəninfo.az-ın məlumatına görə , fevralın 15-də Ağ Evin milli təhlükəsizlik üzrə kommunikasiyalar üzrə müşaviri Con Kirbi Rusiyanın peyk əleyhinə silahlar hazırladığını bəyan edib.
Bundan əvvəl ABŞ Konqresinin Nümayəndələr Palatasının kəşfiyyat komitəsinin sədri xəbərdarlıq etmişdi ki, “milli təhlükəsizliyə ciddi təhdid” var.
“Bu, Rusiyanın inkişaf etdirdiyi anti-peyk imkanları ilə bağlıdır. Bu, işə salınmış aktiv qabiliyyət deyil və Rusiyanın bu xüsusi qabiliyyətə can atması narahatlıq doğursa da, heç kimin təhlükəsizliyinə birbaşa təhlükə yoxdur”, – Kirbi brifinqdə bildirib.
Ağ Evin müşaviri qeyd edib ki, söhbət “insanlara hücum etmək və ya Yer kürəsində fiziki məhvə səbəb olmaq üçün” istifadə edilə bilən silahdan getmir. O, əlavə edib ki, təhlükə “kosmosa əsaslanacaq”, lakin silahın nüvə başlığına sahib olub-olmayacağı barədə ətraflı məlumat verməkdən imtina edib.
Hər hansı anti-peyk silahının hazırlanması, Kirbinin fikrincə, insanların rabitə, hava proqnozu və s. üçün peyklərdən asılılığını nəzərə alaraq, “ümumi narahatlıq doğurmalıdır”.
O, kosmosa silah yerləşdirilməsini beynəlxalq hüququn və Rusiyanın da daxil olduğu 130-dan çox ölkənin imzaladığı müqavilənin pozulması adlandırıb.
ABŞ prezidenti Co Bayden də vəziyyətlə bağlı məlumatlandırılıb və məsələ ilə bağlı Moskva ilə əlaqə saxlamağı tapşırıb.
“O, bir sıra ilkin tədbirlər, o cümlədən konqres liderləri ilə əlavə müzakirələr, Rusiya, müttəfiqlərimiz və tərəfdaşlarımız və maraqları təhlükə altında olan dünyanın digər ölkələri ilə birbaşa diplomatik əlaqə qurmaq əmri verib”, – Con Kirbi bildirib.
Bundan əvvəl ABC televiziya şirkətinin mənbələri Rusiyanın kosmosda nüvə silahı yerləşdirmək niyyətində olduğunu bildirmişdilər. The New York Times-ın mənbələri də bu proqramın hələ də işlənmə mərhələsində olduğunu bildiriblər. Bu xəbərlərə cavab verən Rusiya prezidentinin mətbuat katibi Dmitri Peskov bunları “Ağ Evin növbəti hiyləsi” kimi qiymətləndirib, məqsədi Konqresi əlavə maliyyələşdirmə qanun layihəsini təsdiq etməyə məcbur etməkdir.
