ABŞ-da məskunlaşan terrorçular adanın şərqində əhalinin elektrik enerjisi ilə bağlı şikayətlərini bəhanə edərək Kubada sabitliyi pozmağa çalışırlar. Vətəninfo.az xəbər verir ki, bu barədə bazar günü Kuba prezidenti Migel Diaz-Kanel bildirib.
“Bir neçə nəfər elektrik enerjisi və ərzaq paylanması ilə bağlı narazılığını bildirib. İnqilabın düşmənləri bu kontekstdən sabitliyi pozmaq məqsədilə istifadə etməyə çalışırlar. Son bir neçə saat ərzində biz ABŞ-da yerləşdirilən və dəfələrlə pislədiyimiz terrorçuların ölkənin daxili nizamına zidd hərəkətləri necə təşviq etdiklərinin şahidi olduq”, – dövlət başçısı özünün X səhifəsində yazıb.
O qeyd edib ki, hakimiyyət əhalinin problemlərini həll etməyə çalışacaq. “Hakimiyyət insanların şikayətlərinə diqqətlə yanaşacaq, onları dinləyəcək, dialoq aparacaq, vəziyyəti düzəltməyə yönəlmiş çoxsaylı səyləri izah edəcək. Bu vəziyyətdən çıxmaq üçün sülh yolu ilə işləməyə davam edəcəyik”, – o yazıb.
Bazar günü səhər yerli xəbər portalı Cubadebate yanacağın olmaması və elektrik stansiyalarının vəziyyəti səbəbindən Santyaqo-de-Kubanın bir sıra rayonlarının sakinlərinin ərzaq və elektrik enerjisi ilə təmin olunmasını tələb edən şikayətləri barədə məlumat yayıb. Pik saatlarda enerji çatışmazlığı ümumi tələbatın 30 faizinə çatır. Xüsusilə respublikanın şərqində elektrik enerjisində planlı fasilələr baş verir.
