Hizbullah hərəkatı Livanın cənubundan İsrailin sərhəd bölgəsindəki hərbi mövqelərə və yaşayış məntəqələrinə müxtəlif silahlarla 11 hücum təşkil edildiyini açıqlayıb.
Vətəninfo.az xəbər verir ki, Hizbullah son 24 saat ərzində Livan ərazisindən İsrailə qarşı həyata keçirdiyi hücumlarla bağlı açıqlama verib.
Açıqlamada İsrailin Livanın cənubundakı Hula qəsəbəsinə təşkil etdiyi və 3 mülki vətəndaşın həyatını itirdiyi hücumuna cavab olaraq İsrailin Kiryat Şmona və Kfar Blum yaşayış məntəqələrinə onlarla Katyuşa raketinin atıldığı, Bağdadi və Birket Rişe mövqelərinin, 769-cu Şərq Briqadasının Kiryat Şmona bölgəsindəki qərargahının, Kefr Şubaa təpəsindəki Ruveysat əl-Alem mövqelərinin raketlər və müvafiq silahlarla vurulduğu bildirilib. Açıqlamada İsrailin sərhəddəki hərbi mövqelərində yerləşdirilmiş 2 Merkava tipli tankın da hədəf alındığı vurğulanıb.
İsrail ordusunun radiosu Livandan Kiryat Şmona bölgəsinə 30 raketin atıldığını və 10 raketin hava hücumundan müdafiə sistemi tərəfindən vurulduğunu bildirib.
Oktyabrın 8-dən İsrail ordusu ilə Hizbullah arasında baş verən qarşıdurmalarda 232 Hizbullah üzvü, 48 livanlı mülki vətəndaş, 11 Əməl Hərəkatı, 12 ”Həmas”, 12 İslami Cihad üzvü, 6 İsrail vətəndaşı və 11 əsgər həlak olub.
