Müxtəlif mənbələrə görə, ABŞ-ın İraqdakı səfirliyi raketlə hücuma məruz qalıb. Bu barədə Vətəninfo.az “Əl-Cəzirə” nəşrinə istinadən xəbər verir.
Səfirlik Bağdadın mərkəzində dövlət və diplomatik binaların yerləşdiyi “Yaşıl Zona” adlanan ərazidə yerləşir. Qeyd olunur ki, dekabrın 8-i səhər saatlarında ciddi nəzarət edilən Yaşıl Zona ətrafında partlayış səsləri eşidilib.
Müxtəlif KİV-lər ABŞ və İraq ordusundakı mənbələrinə istinadən bildirirlər ki, səhər saatlarında Yaşıl Zonada raketlər düşüb, həyəcan siqnalları çalınıb.
Müxtəlif sosial şəbəkələrdə raketlərin Yaşıl Zonaya düşdüyünü əks etdirən videolar paylaşılıb. Əl-Cəzirə kanalının xüsusi şöbəsi raketlərin ABŞ səfirliyinin yaxınlığında olduğunu təsdiqləyib.
ABŞ-ın Bağdaddakı səfirliyi hələlik bu xəbərləri təsdiqləməyib. Səfirliyin hava hücumundan müdafiə sistemlərinin işə salınması və ya itkilərin olub-olmadığı da aydın deyil.